Rossiyada targ‘ibotchi Simonyanga suiqasdning oldi olingani aytildi

Targ‘ibotchi Margarita Simonyan va teleboshlovchi Kseniya Sobchakka «suiqasd uyushtirishga uringanlar» qo‘lga olingan.

Kseniya Sobchak va Margarita Simonyan Foto: tvcenter.ru

Rossiya Federal xavfsizlik xizmati (FXX) va Tergov qo‘mitasi xodimlari targ‘ibotchi Margarita Simonyan va teleboshlovchi Kseniya Sobchak o‘ldirilishiga tayyorgarlikning oldi olingani haqida xabar berdi. Ehtimoliy suiqasd Ukraina maxsus xizmatlari tomonidan uyushtirilgani da’vo qilinmoqda.

FXX ma’lumotlariga ko‘ra, bu ish bo‘yicha Moskva va Ryazan viloyatida Simonyan va Sobchakni kuzatib borgan «Paragraf-88» guruhi a’zolari qo‘lga olingan. Ulardan Kalashnikov avtomatlari, patronlar, rezina tayoqlar, pichoqlar va kishanlar olib qo‘yilgan.

FXX ta’kidlashicha, qo‘lga olinganlar «har bir qotillik uchun 1,5 million rubl mukofot» evaziga «Ukraina xavfsizlik xizmati buyurtmasi» bo‘yicha harakat qilganini allaqachon tan olishgan.

2022 yil aprel oyida FXX Vladimir Solovyov va boshqa bir qancha targ‘ibotchilarga suiqasdning oldi olinganini e’lon qilgan edi. Keyinchalik qotillikni rejalashtirishda gumon qilingan olti nafar shaxs hibsga olindi.