Farg‘onadagi yong‘inda halok bo‘lganlar tutundan zaharlangani aytildi

O‘zbekiston bosh vaziri o‘rinbosari Achilboy Ramatov boshchiligida hukumat komissiyasi Farg‘ona shahriga yetib borib, halokatli yong‘in bilan bog‘liq vaziyatni o‘rgandi.

Qayd qilinishicha, dastlabki ma’lumotlarga ko‘ra, 6 nafar fuqaro yong‘indan chiqqan tutundan zaharlanish oqibatida halok bo‘lgan. Sud-tibbiy ekspertizaning dastlabki xulosasi ham shundayligi aytilmoqda.

29 iyul kuni Farg‘ona shahridagi 4 qavatli bino yerto‘lasida joylashgan karaoke kafesida yong‘in sodir bo‘ldi. Oqibatida 6 nafar fuqaro halok bo‘ldi, 7 nafari turli darajadagi tan jarohati bilan shifoxonaga yuborildi.

Yong‘in sabablarini o‘rganish bo‘yicha tuzilgan hukumat komissiyasining ishi davom etmoqda.