Avstraliyada bortida AQSh harbiylari bo‘lgan samolyot halokatga uchradi

Avstraliya shimolidagi mashg‘ulotlar chog‘ida bortida 20 kishi bo‘lgan Amerika harbiy samolyoti halokatga uchradi. Bu haqda 27 avgust, yakshanba kuni mahalliy OAV xabar berdi. Halokat sabablari haqida ma’lumot taqdim etilmagan. 

Avstraliya Mudofaa vazirligi Osprey konvertoplani bortida amerikalik harbiylar bo‘lganini tasdiqladi va avstraliyalik askarlar jabrlanmaganini ma’lum qildi. «Ushbu muhim dastlabki bosqichda bizning e’tiborimiz voqea oqibatlarini bartaraf etish va barcha aloqador shaxslarning xavfsizligini ta’minlashga qaratilgan», deyiladi vazirlik bayonotida.

ABC: Uch kishi qutqarib qolindi 

Samolyot Darvin shahridan shimoldagi Tivi orollari hududidagi mashqlarda qatnashgan. Avstraliyaning ABC telekanali xabariga ko‘ra, uch kishi qutqarib qolindi – ulardan biri og‘ir ahvolda, ikki nafarining ahvoli barqaror. 

Avstraliyaning Shimoliy hududi qutqaruv xizmati favqulodda vaziyatlar bo‘yicha onlayn xaritasi yakshanba kuni ertalab Melvill orolida «samolyot halokati» sodir bo‘lganligini ko‘rsatdi. 

Vertolyotning vertikal uchish imkoniyati va turbovintli samolyot tezligini o‘zida mujassam etgan Osprey vint qanotli konvertoplani AQSh va Avstraliya qurolli kuchlarining qo‘shma mashqlari bo‘lmish Predators Run mashg‘ulotlarida ishtirok etayotgandi.