Qamchibek Tashiyev Qirg‘iziston futbol ittifoqi prezidenti etib saylandi

Bishkekda o‘tgan kongressda Qirg‘iziston milliy jamoasining Osiyo kubogidagi muvaffaqiyatsizligi ortidan QFI prezidenti Mederbek Sidikovning iste’foga chiqarilgani rasman ma’lum qilindi. 

Yangi rahbar etib mamlakat futbol ittifoqi prezidentligiga yagona nomzod sifatida ro‘yxatdan o‘tgan Qirg‘iziston milliy xavfsizlik davlat qo‘mitasi raisi Qamchibek Tashiyev saylandi. 

Qirg‘iziston futbol ittifoqi birinchi vitse-prezidenti etib Nurdin Bukuyev saylandi. Ushbu sobiq hakam futzal bo‘yicha jahon chempionatlari rekordchisi sanaladi. 

Avvalroq, Qirg‘iziston prezidenti Sadir Japarov mamlakat futbol ittifoqi rahbarligiga Tashiyev nomzodini taklif etgan edi.

Eslatib o‘tamiz, Qirg‘iziston Osiyo kubogi-2023 bahslarida faqat Ummon bilan durang (1:1) qayd etgan holda turnirni guruh bosqichida yakunladi. O‘zbekiston va Tojikiston ushbu turnirda chorakfinalga yo‘llanma olganidan bir kun o‘tib, QFIning amaldagi rahbari Mederbek Sidikov iste’foga chiqqani xabar qilingandi.