O‘zbekiston Kuvaytga go‘sht va qishloq xo‘jaligi mahsulotlarini yetkazib beradi

Kuvaytda bo‘lib o‘tgan Kuwait International Agro Food Exhibition ko‘rgazmasida O‘zbekiston kompaniyalari o‘z mahsulotlari bilan faol ishtirok etdilar.

Foto: "Dunyo" AA

Jumladan, ko‘rgazma doirasida O‘zbekiston elchixonasi pavilionida mahalliy ishlab chiqaruvchilarning mahsulotlari namoyish etildi.

Kuvayt xalqaro ko‘rgazmasi agrosanoat va oziq-ovqat sohalarini o‘zida qamrab olgan bo‘lib, oziq-ovqat sanoati, sut mahsulotlari, meva, dengiz mahsulotlari, qadoqlash texnologiyalari va boshqa sohalardagi mahsulotlar va texnologiyalarning keng ko‘lamdagi namoyishini ta’minladi.

Ko‘rgazma doirasida, shuningdek, O‘zbekiston va Kuvayt kompaniyalari vakillari o‘rtasida uchrashuvlar bo‘lib o‘tdi, ularda O‘zbekistondan Kuvaytga ho‘l va quruq mevalar, sabzavotlar, asal va go‘sht mahsulotlarini eksport qilish, mahsulotlarni yetkazib berishning transport-logistika yo‘llari muhokama qilindi.

Ikki mamlakat tadbirkorlari tomonidan Kuvaytga go‘sht va qishloq xo‘jaligi mahsulotlarini yetkazib berish bo‘yicha savdo shartnomalari imzolandi.