Kaspi.kz Uzcard va Humo kartalariga pul o‘tkazmalarini yo‘lga qo‘ydi

Qozog‘istonning Kaspi fintex kompaniyasi O‘zbekistonning Uzcard va Humo to‘lov tizimlari kartalariga pul o‘tkazmalarini ishga tushirdi. Bu haqda Qozog‘iston nashrlari ma’lum qildi.

Avval Qozog‘istondan O‘zbekistonga faqat Visa yoki Mastercard kartalariga pul o‘tkazish mumkin bo‘lgan bo‘lsa, endilikda Kaspi.kz superilovasi orqali O‘zbekistonning milliy to‘lov tizimlari Uzcard va Humo kartalariga ham o‘tkazmalar amalga oshirish mumkin. Bunda faqat kartaning raqamini kiritish kifoya, oluvchining ismi avtomatik tarzda aks etadi.

Kaspi.kz asoschisi va rahbari Mixail Lomtadze bu orqali O‘zbekiston va Qozog‘iston o‘rtasidagi do‘stlik va hamkorlikni rivojlantirishga kompaniya o‘z hissasini qo‘shayotganidan mamnunligini bildirdi.

“O‘zbekiston va Qozog‘iston aholisi o‘rtasida azaldan do‘stona, qarindoshlik, ishbilarmonlik va madaniy aloqalar mavjud. Odamlar bir-birinikiga mehmonga, ish yuzasidan safarga boradi, shuning uchun to‘lov va pul o‘tkazmalarini amalga oshirish zarurati tez-tez yuzaga keladi”, – deydi u.

Kaspi haqida

Kaspi.kz – Qozog‘istonda to‘lov tizimi, marketpleys va fintexni o‘zida birlashtirgan ekotizim bo‘lib, uning markazida mamlakatdagi eng mashhur mobil superilova – Kaspi.kz turadi. Bu ilovadan deyarli 15 million qozog‘istonlik foydalanadi.

Kompaniya O‘zbekiston bozoriga ham qiziqish bildirgan, 2024 yilning yozida Humo to‘lov tizimini xususiylashtirish jarayonida qarnashmoqchi bo‘lgandi. Noyabrda kompaniya bu rejasidan voz kechganini ma’lum qildi.

Kaspi.kz 2024 yilda AQShning NASDAQ fond birjasida IPO o‘tkazdi. Ayni paytda kompaniyaning kapitallashuvi qariyb 24 milliard dollarni tashkil etadi.