Rossiya madhiyasi ijrochisi jahon chempionati finalida madhiya so‘zlarini unutib qo‘ydi

Rossiya va Shvetsiya terma jamoalari o‘rtasidagi to‘p bilan xokkey bo‘yicha jahon chempionatining final uchrashuvi oldidan Rossiya madhiyasi ijrochisi madhiya matni so‘zlarini chalkashtirib yubordi va biroz tanaffusdan keyin uni kuylashni davom ettirdi.   

Qo‘shiqchi qiz madhiyani a kapella uslubida ijro etayotganda ehtimol juda hayajonlanib ketgan. Qizning ovozi titray boshlagan, birozdan keyin esa umuman bir necha soniyaga jim bo‘lib qolgan. Bu holat tomoshabinlardan ayrimlarining noroziligiga sabab bo‘lgan va ular tomondan hushtakbozlik qilingan.

Qo‘shiqchi o‘z xatosi uchun uzr so‘rab, yana kuylashda davom etgan. Noqulay vaziyatga qaramay, xokkeychilar va ko‘pchilik tomoshabinlar qizni qo‘llab-quvvatlab, unga jo‘r bo‘la boshlashgan. Madhiya yakunlangandan keyin tribunalardan guldiros qarsaklar yangragan.

Ijtimoiy tarmoqlar foydalanuvchilarining yozishicha, madhiyani rus qiz emas, balki shvetsiyalik qiz ijro etgan va shuning uchun u tilni yaxshi bilmasligi hamda hayajonini bosa olmagani sabab xatoga yo‘l qo‘ygan.  

Shvetsiyaning Sandvikene shahridagi "Yoransson Arena" yopiq stadionida o‘tgan uchrashuv mezbon terma jamoa foydasiga 4:3 hisobida yakunlandi.