«Chelsi» ham FIFA tomonidan jiddiy taqiqqa uchrashi mumkin

FIFA so‘nggi sakkiz yilda uchinchi marta «Chelsi» klubining yosh futbolchilarni ro‘yxatdan o‘tkazganda transfer qoidalarini buzganlikda gumon qilib tekshiruv o‘tkazadi. Bu haqda The Telegraph nashri xabar tarqatdi.

Londonliklar ustidan birinchi tekshiruv 2007 yilda o‘tkazilgan bo‘lib, o‘shanda Fransiyaning «Lans» klubidan Gael Kakuta klubga kelib qo‘shilganda «Chelsi» qoidalarni buzgani ma'lum qilingan. Ikki yil o‘tib «Chelsi»ga transfer taqiqi joriy qilingan, biroq ko‘p o‘tmay bu qaror bekor qilingandi. O‘tgan yili esa FIFA Bertran Traorening londonliklar safiga kelib qo‘shilishi bo‘yicha tekshiruv o‘tkazgandi. 

Hozirda ham FIFA «Chelsi»ning transfer siyosati bo‘yicha tekshiruv o‘tkazmoqda. Biroq bu ishni aynan qaysi transfer yuzasidan olib borilayotgani noma'lum. Bu paytga kelib klubdagilar FIFA tomonidan bildirilayotgan shubhalarning hech biri to‘g‘ri emas deb hisoblamoqda va barcha transferlar tegishli qonun talablari asosida amalga oshirilganiga ishonchi komil.