KXDR va Janubiy Koreya rahbarlarining tarixiy uchrashuvi jonli efirda uzatiladi

Koreya Respublikasi prezidenti Mun Chje In va KXDR yetakchisi Kim Chen Inlarning 27 aprelga mo‘ljallangan uchrashuvi internet orqali jonli efirda uzatiladi. Bu haqida 16 aprel kuni Janubiy Koreya prezidentining matbuot kotibi Yun Yon Chan xabar berdi. 

"Hukumat tarixiy sammitga bag‘ishlangan maxsus veb-saytni ishga tushiradi", - deya izoh beradi Yun Yon Chan. U shuningdek saytga kiruvchilar jonli efirda sammitning borishini kuzatishlari va bu uchrashuvni avvalgilariga nisbatan shaffof o‘tishini ta'minlash imkonini berishini ta'kidladi. Bundan avval Koreya mamlakatlari rahbarlarining ikki sammiti 2000 va 2007 yillarda o‘tkazilgan.

Ma'lumotlarga ko‘ra, www.koreasummit.kr portali 17 aprel kuni yarim tunda (mahalliy vaqt bilan) ish boshlaydi. Unda foydalanuvchilar muzokaralarga tayyorgarlik jarayoni, so‘nggi yangiliklar, ekspertlar sharhi, suratlar va videomateriallar bilan tanishishlari mumkin bo‘ladi. Portal to‘qqiz chet tilida faoliyat yuritadi: ingliz, xitoy, yapon, fransuz, ispan, nemis, rus, arab va vetnam tillari.