OAV: KXDRda 3 yil ichida ilk bor amnistiya o‘tkaziladi

Shimoliy Koreya KXDR tashkil etilganligining 70 yilligi munosabati bilan amnistiya o‘tkazadi. U 9 sentabrda nishonlanadi, deb xabar qilmoqda Koreya markaziy telegraf agentligi. 

KXDR Oliy xalq kengashi prezidiumi "vatani va xalqiga qarshi jinoyat qilganlar"ni kechirish to‘g‘risidagi hujjatni tasdiqladi. U 1 avgustdan kuchga kiradi. Biroq ozodlikka chiqadigan mahbuslar soni haqida xabar qilinmagan. 

Shimoliy Koreya so‘nggi marotaba 3 yil avval amnistiya aktini qo‘llagan edi. O‘shanda Koreya mehnat partiyasi tashkil etilganligining 70 yilligi munosabati bilan amnistiya hujjati qabul qilingandi. Bundan avval 2012 yili respublika asoschisi va birinchi rahbari Kim Ir Sen tavalludining 100 yilligi, uning o‘g‘li va vorisi Kim Chen Irning 70-yilligi munosabatlari bilan amnistiya e'lon qilingan edi.