Barselonadagi terakt tashkilotchilari «Kamp Nou»ga ham hujum rejalashtirishgan

2017 yilning 17 avgust kuni Barselonada terrorchilik harakatini amalga oshirgan jihodchilar guruhi «Kamp Nou» stadioniga ham hujum uyushtirishni rejalashtirishgan.

El Periódico xabariga ko‘ra, terrorchilik harakati Ispaniya chempionati 1-turidan o‘rin olgan «Barselona» - «Betis» o‘yini paytida amalga oshirilishi mo‘ljallangan.

Terrorchilik guruhi a'zolaridan biri Muhammad Xishomiyning mobil telefonidan o‘yinni sanasi, stadionga kirish tartibi va stadionning fotosuratlari topilgan. Shuningdek, guruhning bir necha a'zosi «Barselona» do‘konidan turli atributikalarni sotib olishgan.

El Periódico nashrining taxminiga ko‘ra, terrorchilar 2015 yil noyabr oyida Fransiya terma jamoasining «Stad de Frans» stadionidagi o‘yinida yuz bergan teraktga o‘xshash amaliyotni qo‘llashga urinishgan.