Osiyo o‘yinlari. Yana ikki o‘zbekistonlik sambochi bronza uchun gilamga chiqadi

Osiyo o‘yinlarining o‘n uchinchi kunida sambo bo‘yicha bahslar o‘tkazilmoqda.

Erkaklar o‘rtasidagi musobaqada O‘zbekiston sharafini -52 kg vazn toifasida himoya qilayotgan Islom Ahmedjanov ilk bahsdayoq tojikistonlik raqibi Jomi Hasaniydan yengildi (0:4). Jomi Hasaniy yarim finalga yetib borgach, Ahmedjanovda bronza uchun o‘tish o‘yinlarida ishtirok etish imkoniyati paydo bo‘ldi.

Shundan so‘ng u 3 bosqichdan iborat o‘tish o‘yinlarida qatnashdi. Ahmedjanov avvaliga eronlik Sohil Jamalabadiy ustidan g‘alaba qozondi (2:0), keyingi bosqichda indoneziyalik Mavlana Muttaqindan ustun keldi (4:0). Final bosqichida esa yaponiyalik Kota Yamamotoga qarshi gilamga chiqqan Islom Ahmedjonov yana g‘alaba qozondi (4:0).

Endi u bronza medali uchun qozog‘istonlik Beymbet Kanjanovga qarshi gilamga chiqadi.

Shu vazn toifasidagi yana bir o‘zbekistonlik sambochi Ahmad Rahmatulloyev nimchorak finalda indoneziyalik Muhammad Vahyudi to‘sig‘idan o‘tdi (3:1). Ammo chorak finalda qozog‘istonlik Beymbet Kanjanovga mag‘lub bo‘ldi (1:3). Shundan so‘ng bronza medal uchun o‘tish bahslarida ishtirok etgan Rahmatulloyev avvaliga tojikistonlik Somon Sangov bilan bellashdi va g‘alaba qozondi (3:0). Uning ikkinchi bosqichdagi raqibi suriyalik Husn Munir bo‘ldi. U bu raqibini ham taslim etdi (3:0).

Endi u bronza medal uchun tojikistonlik Jomi Hasaniy bilan bellashadi.

Bundan avvalroq O‘zbekiston sambo jamoasining ikki vakili, -48 kg vazn toifasida turnirga kelgan Madina Turg‘unboyeva va Nodira Gulova o‘zaro kurash olib borishi ma'lum bo‘lgandi.