Ukrainadagi aeroportlardan birining asfalti sotuvga qo‘yildi

Ukrainaning SeTAM davlat korxonasi xodimlar maoshi bo‘yicha qarzni uzish maqsadida Cherkass shahridagi xalqaro aeroportning asfaltini sotuvga qo‘ydi. Bu haqda Ukraina adliya vazirligi saytida ma'lum qilingan.

10 ming tonna ko‘chirib olingan asfaltbetonning boshlang‘ich narxi 1230000 grivenga baholangan. Aeroportning maosh bo‘yicha qarzi esa bir million grivendan ko‘proqni tashkil qiladi. Auktsion 11 oktabrda o‘tkaziladi. 

Ta'kidlanishicha, 1997 yilda aeroport samolyotlarni qabul qilishni to‘xtatgan, 2001 yilda esa moliyalashtirish bilan bog‘liq muammolar sababli yopilgan. 2007 yilda aeroport yangi sertifikat olib, yana ishini boshlagan. 2007 yildan 2009 yilgacha rekonstruksiya qilingan, unda uchish-qo‘nish polosasi va aerovokzal tiklangan.

Ushbu aeroport kutilmagan vaziyatlar va yomon ob-havo sharoiti holatlariga zaxira aeroporti sifatida xizmat qilgan.