O‘zbekiston aeroportlarni Rossiya kompaniyasi boshqaruviga berishdan bosh tortishi mumkin

Rossiyaning «Novaport» xoldingi va O‘zbekiston hukumati o‘rtasida bir nechta aeroportni rekonstruksiya qilish bo‘yicha muzokaralar boshi berk ko‘chaga kirib qoldi. O‘zbekiston hukumati investorning talabiga binoan aeroportlarni 30 yil muddatga berishga tayyor emas, deb yozmoqda «Kommersant'».

Mamlakat rasmiylari dekabr oyi boshlarida Yaponiyaning Sumitomo Corporation shirkati bilan uchrashuv o‘tkazib, boshqa investorni qidirishni boshladi.

Biroq, «Novaport» muzokaralardan chiqib ketmadi hamda aktivlarga bo‘lgan qiziqishni saqlab qolmoqda. Mutaxassislarning ta'kidlashicha, yapon kompaniyalari ham qisqa muddatli konsessiyaga rozi bo‘lishi ehtimoldan yiroq.

«Novaport» hanuzgacha O‘zbekistonning Samarqand, Namangan va Urganchdagi aeroportlarini boshqaruvga olish shartlari to‘g‘risida kelisha olmayapti. Muzokaralardan xabardor nashr manbasiga ko‘ra, «Novaport» va O‘zbekiston Respublikasi Investitsiyalar va tashqi savdo vazirligi vakillarining so‘nggi uchrashuvi taxminan ikki oy oldin o‘tkazilgan hamda foydalanish muddati masalasida to‘xtab qolgan. «Novaport» 30 yildan ko‘proq vaqt davomida aeroportlarni boshqarmoqchi, O‘zbekiston hukumati vakillari bunga rozi bo‘lmayapti.

AEON xoldingi («Novaport»ni boshqaradi - tah.) egalaridan biri Roman Trotsenkoning bildirishicha, O‘zbekiston hukumati bilan muzokaralardan voz kechmagan: «Aeroportlarga qiziqish saqlanib qolmoqda. Shu bilan birga, mamlakat rasmiylari ushbu aktivlar bilan o‘zlari ma'qul deb bilgan narsani qilishlari mumkin».

May oyida «Novaport» O‘zbekiston hukumati bilan hadli bitimni imzoladi. «Kommersant'» suhbatdoshlari taxminicha, xoldingning ushbu loyihalarda ishtirok etishi MDHda yuqori daromadli so‘nggi infratuzilma aktivlaridan biri bo‘lgan, xususiy egasi yoki sarmoyadori bo‘lmagan Toshkent aeroporti boshqaruvini qo‘lga kiritish uchun birinchi qadamga aylanishi kerak edi.

Birinchi obekt - 2022 yilda Shanxay hamkorlik tashkiloti sammitini qabul qiladigan Samarqand shahri aeroportidir. Sohadagilarning fikricha, modernizatsiya muddatlari o‘ta qisqa. Namangan va Urganch aeroportlarini modernizatsiya qilishga taxminan besh yil vaqt beriladi.

«VTB Kapital» vakili Yelena Saxnova Samarqand aeroportiga ehtimoliy sarmoyalar hajmini 300-500 million dollarga baholamoqda. «Kommersant'» suhbatdoshlarining so‘zlariga ko‘ra, sarmoyalar yirik xolding loyihalari darajasida turibdi, ammo aniq miqdor oshkor etilmayapti.

Bundan oldin, Transport vazirligi vakili O‘zbekistonning bir gramm manfaati ham «Novaport»ga o‘tib ketmasligi haqida aytgandi.