Rossiyada 11 nafar o‘zbekistonlikning o‘limida ayblanayotgan Xitoy fuqarosi shikoyat arizasi bilan chiqdi

«Interfaks» xabariga ko‘ra, shikoyat arizasi ayblanuvchining advokatlari tomonidan berilgan.

«Ayblanuvchining advokatlaridan sudning qamoqqa olish tarzidagi ehtiyot chorasini qo‘llash to‘g‘risidagi qarori ustidan shikoyat arizasi kelib tushdi», - dedi sud matbuot xizmati xodimi.

21 yanvarga o‘tar kechasi Rossiyaning Tomsk oblasti Asino tumanidagi bir qavatli yog‘och uyda yong‘in ro‘y berib, uyning 208 metr kvadrat maydoni yonib ketgandi. 

Dastlabki xabarlarda yong‘in oqibatida 11 kishi halok bo‘lgani, ulardan 10 nafari O‘zbekiston fuqarolari ekani aytilgandi. Keyinroq yong‘in oqibatida halok bo‘lgan o‘zbekistonliklar soni 11 kishiga yetgani xabar qilindi.

Binoni xitoylik investorga tegishli bo‘lgan «Grin Vud» MChJ ijaraga olgan.

Odamlarning o‘limi tufayli Rossiya Tergov qo‘mitasining Tergov boshqarmasi RF Jinoyat kodeksining 109-moddasi 3-qismi bilan jinoyat ishi qo‘zg‘atdi (ehtiyotsizlik sababli ikki yoki undan ortiq shaxsning o‘limi).

«Grin vud» kompaniyasi 2011 yilda Tomsk oblasti Asino shahrida ro‘yxatga olingan. Sun Anni ismli shaxs 2019 yildan buyon uning direktori hisoblanadi.