Rossiyada xorijliklarni deportatsiya qilish 15 iyungacha to‘xtatildi

Rossiya xorij fuqarolarini deportatsiya qilishni 15 iyungacha to‘xtatdi. Bu haqda Rossiya IIV migratsiya masalalari bo‘yicha bosh boshqarmasi boshlig‘i Valentina Kazakova ma'lum qildi.

"Rossiya prezidentining farmoniga muvofiq, hozirda Rossiya hududida bo‘lib turgan va hujjatlari muddati tugaydigan fuqarolarning barcha hujjatlari amal qilish muddati 90 kunga to‘xtatiladi. Ya'ni 15 martdan 15 iyungacha. Bu degani, patentlar, mehnat qilish uchun ruxsatnoma, vizalar, vaqtinchalik yashash ruxsatnomalari – bu hujjatlarning barchasi 90 kunga uzaytiriladi", - dedi Kazakova.

Uning so‘zlariga ko‘ra, bu davr mobaynida xorijliklarga nisbatan "deportatsiya, mamlakatdan chiqarib yuborish, readmissiya yoki mamlakatda bo‘lishini istamaslik borasida hech qanday qaror qabul qilinmaydi".

Bundan tashqari, xorij fuqarolaridagi mavjud hujjatlar bekor qilinmaydi.