Buxoroda koronavirusga chalingan 35 yoshli ayol vafot etdi

Rasmiy xabarga ko‘ra, G‘ijduvon tumanida yashovchi 35 yoshli ayol D.Sh. 1 iyul kuni koronavirusga gumon qilinib, Buxoro viloyati yuqumli kasalliklar shifoxonasining reanimatsiya bo‘limiga yotqizilgan.

Unga «ikki tomonlama pnevmoniya, o‘tkir nafas yetishmovchiligi 3-daraja, semizlik 2-daraja» tashxisi qo‘yilgan.

«Shifokorlar tomonidan standartlar asosida o‘tkazilgan tezkor reanimatsion muolajalarga qaramasdan bemor o‘tkir nafas va yurak yetishmovchiligidan vafot etdi», – deyiladi vazirlik xabarida.

Ayni paytda O‘zbekistonda rasman ma'lum qilingan koronavirus qurbonlari soni 31 nafarni tashkil etmoqda.

Bugun COVID-19`dan vafot etgan boshqa bir bemor – toshkentlik 65 yoshli erkak ham shifoxonaga 1 iyul kuni yotqizilgani xabar qilingandi. SSVning ertalabgi axborotida bemorlardan 8 nafari o‘ta og‘ir ahvolda ekani aytilgan. 

Ma'lumot uchun, pandemiya davrida Toshkentda 17, Namanganda 4, Samarqand, Buxoro, Surxondaryo va Jizzaxda 2tadan, Farg‘ona va Qashqadaryoda bittadan o‘lim ro‘y berdi.