Farg‘onadan Istanbulga ilk parvoz amalga oshirildi

31 mart kuni soat 8:50da Uzbekistan Airways'ning HY277 raqamli reysi Farg‘ona xalqaro aeroportidan Turkiyaning Istanbul shahriga qarab samoga ko‘tarildi.

132 nafar yo‘lovchini o‘z bag‘riga olgan Airbus A320 Neo uchog‘i 5 soat 40 minutda Istanbul xalqaro aeroportiga qo‘ndi.

Farg‘ona xalqaro aeroporti Tashishni tashkillashtirish bo‘limi boshlig‘i o‘rinbosari Erkinjon Obidovning Kun.uz muxbiriga ma'lum qilishicha, endilikda «Farg‘ona – Istanbul – Farg‘ona» reysi haftada ikki marta – chorshanba va shanba kunlari amalga oshiriladi.

Shu kunlari parvozni amalga oshirgan samolyot tushdan so‘ng Istanbuldan Farg‘onaga HY278 raqamli reys bilan qaytib keladi.

Erkinjon Obidovga ko‘ra, 28 martdan boshlab Farg‘onadan Samarqand shahriga haftasiga 7 marta aviaqatnovlar yo‘lga qo‘yildi. Yaqin kelajakda esa Buxoro, Termiz viloyatlari hamda Dubay va Seul shaharlariga ham to‘g‘ridan to‘g‘ri qatnovlar yo‘lga qo‘yilishi ko‘zda tutilgan.

Eslatib o‘tamiz, «Toshkent – Andijon – Toshkent» yo‘nalishidagi aviaqatnov ikki yarim yillik tanaffusdan so‘ng, 6 apreldan boshlab qayta yo‘lga qo‘yilmoqda.