Qozog‘istondagi tartibsizliklar oqibatida jarohatlanganlar va halok bo‘lganlar soni ma’lum qilindi

Qozog‘istonda yuz bergan tartibsizliklar davomida 4,5 mingdan ziyod kishi jabrlangan, morglarga 225 kishining jasadi olib kelingan. Bu haqda Qozog‘iston bosh prokuraturasi vakili Serik Shalabayev ma’lum qildi.

Foto: Reuters

"Bugungi kun holatiga 4578 nafar inson jabrlangani aniqlangan, ulardan 4353 nafari jarohatlangan, jumladan, 3393 nafar kuch ishlatish tuzilmalari xodimlari. Favqulodda holat davrida morglarga 225 kishining jasadi olib kelingan", - dedi Shalabayev.

Uning qo‘shimcha qilishicha, halok bo‘lganlarning 19 nafari politsiya xodimlari va harbiylardir.

Qozog‘iston huquq-tartibot organlari tomonidan 446 kishi qo‘lga olingan.

Shalabayevning ma’lumot berishicha, tergov-operativ guruhi tomonidan 546ta jinoyat ishi o‘rganilmoqda, xususan, ularning 44tasi terrorizm, 34tasi ommaviy tartibsizliklar, 15tasi qotillik ishlariga aloqador.

#tartibsizlik #Qozog‘iston

2 yanvar kuni Qozog‘istonning Mang‘istau oblastida suyultirilgan gaz narxi ikki baravarga ko‘tarilganidan norozi bo‘lgan qozog‘istonliklar ommaviy mitingga chiqishdi va keyingi kunlarda namoyishlar butun mamlakat bo‘ylab yoyildi.