“Faoliyatimda bunaqa katta ko‘lamli o‘chish bo‘lmagan” - dispetcher

25 yanvarda ro‘y bergan blekautdan keyin O‘zbekistonda energotizim qariyb iziga tushdi. Kun.uz muxbiri o‘sha kuni ta’minotni tiklash ishlari avj sur’atda olib borilayotgan vaqt – kunning ikkinchi yarmida Toshkent shahar elektr tarmoqlari korxonasida bo‘ldi.

Dispetcher Pavel Sidelnikov biz bilan suhbatda bunday katta masshtabdagi avariya uning faoliyatida ilk marta bo‘lganini aytdi.

“Mening faoliyatimda bunday katta ko‘lamli o‘chish bo‘lmagan. Elektr uzatuvchi qurilmalar zaxira manbalarisiz qoldi. Hozir shu zaxira qurilmalarini ishga tushirish uchun vaqtimiz ketyapti. Aynan shu tufayli uzilishlardan keyin tiklanish biroz cho‘ziladi”, – dedi u.

Dispetcherning aytishicha, birinchi navbatda o‘ta muhim obektlar – kasalxonalar, shuningdek, Senat va Prezident Administratsiyasi kabi oliy hokimiyat idoralari elektr bilan ta’minlangan.

“Oson bo‘lmayapti, lekin imkonimiz boricha vaziyatdan chiqishga harakat qilyapmiz. Har xil odamlardan har xil qo‘ng‘iroqlar bo‘lib turadi. Alohida kimnidir birinchi bo‘lib ulab berish degan narsa yo‘q. Biz ulasak, biror tumanda yashayotganlarning barchasini ulaymiz. Do‘q urishlar, qo‘rqitishlar ham bo‘lib turadi, biz, albatta, ruhiy tomondan bunga tayyormiz, odamlarga tushuntiramiz, va’da beramiz va ulab beramiz. Hatto ayrim odamlar ish joyimizga kelgan paytlar ham bo‘lgan – qo‘rqitishga urinishgan, u qilaman, bu qilaman, degandek. Biz bunday holatlardan ham chiqib ketganmiz. Vaziyatni tushuntirganmiz, keyin elektr berganmiz va yakunda ular bizga hatto tashakkur aytishgan.

Bizning ishda stresslarga chidamsiz xodimlar uzoq ishlolmaydi”, – deydi Pavel Sidelnikov.