O‘zbekiston va Qozog‘iston qo‘shma ulgurji tarqatish markazlari tarmog‘ini tashkil qiladi

Joriy yil 11 fevral kuni O‘zbekiston bosh vaziri o‘rinbosari - investitsiyalar va tashqi savdo vaziri Sardor Umrzoqov Qozog‘iston bosh vazirining O‘zbekistonga tashrifi doirasida Toshkentda bo‘lgan Qozog‘iston bosh vaziri o‘rinbosari - savdo va integratsiya vaziri Baxit Sultonov bilan uchrashdi.

Foto: Investitsiyalar va tashqi savdo vazirligi

Tomonlar keyingi 10 yil ichida O‘zbekiston va Qozog‘iston o‘rtasidagi o‘zaro tovar ayirboshlash hajmini 5 milliard dollarga yetkazish bo‘yicha “Yo‘l xaritasi” ijrosini muntazam ravishda muhokama qilib borish va monitoringini amalga oshirish maqsadida ekspertlardan iborat ishchi guruhlarning hamkorligini faollashtirishga kelishdi.

Ikki mamlakat hududida qo‘shma ulgurji tarqatish markazlari tarmog‘ini tashkil qilish bo‘yicha “Yo‘l xaritasi”ni hayotga joriy etish borasida navbatdagi tadbirlar rejalashtirildi. Mazkur tashabbusning ro‘yobga chiqishi O‘zbekiston va Qozog‘iston ishlab chiqaruvchilari o‘rtasida sanoat kooperatsiyasi rivojiga qo‘shimcha turtki berishi ta’kidlandi.

Uchrashuv yakunida tomonlar ikki mamlakat o‘rtasidagi iqtisodiy hamkorlik doirasida yuzaga keladigan barcha masalalarni zudlik bilan hal qilish uchun yaqin munosabatlarni davom ettirish va faol hamkorlik qilishga kelishib oldi.