Qozog‘istonda o‘zaro mushtlashuv uyushtirgan ikki rossiyalik mamlakatdan chiqarib yuboriladi 

Rossiyaning ikki fuqarosi Uralsk shahridagi tungi klub yonida mushtlashuv uyushtirgani sababli Qozog‘istondan chiqarib yuboriladi. Bu haqda Tengrinews.kz xabar berdi.

Xabarga ko‘ra, voqea 30 sentabr kuni sodir bo‘lgan. Politsiya xodimlari Uralsk shahridagi tungi klub yonida ikki erkak mushtlashayotganini ko‘rishgan.

Politsiyachilarning ma’lumot berishicha, Rossiya fuqarolari mast holatda bir-birlari bilan mushtlashishgan.

Ularga nisbatan mayda bezorilik, jamoat joyida mast holatda yurish, osoyishtalikni buzish moddalari bilan ma’muriy bayonnomalar tuzilgan va 5 sutkaga qamoq jazosi tayinlangan.

Uralsk shahri ixtisoslashgan ma’muriy sudi har ikki qoidabuzarni mamlakatdan chiqarib yuborish to‘g‘risida qaror chiqargan.

Ma’lumotlarga ko‘ra, Rossiyada safarbarlik e’lon qilinganidan so‘ng dastlabki uch kunda Uralsk shahriga deyarli 17 ming rossiyalik o‘tgan.