Qozog‘iston Toyota bilan Rossiyadagi zavodni ko‘chirib o‘tish bo‘yicha muzokara olib bormoqda

Sentyabr oxirlarida Rossiyadagi Toyota zavodi avtomobil ishlab chiqarishni to‘xtatishi ma’lum bo‘lgandi.

Foto: Toyota

Qozog‘istondagi avtomobil ishlab chiqaruvchilar mamlakatda Toyota kompaniyasining yig‘uv zavodini ochish bo‘yicha muzokaralar olib bormoqda. Bu haqda Qozog‘iston sanoat va infratuzilmaviy rivojlanish vaziri Kairbek Uskenbayev ma’lum qildi.

«Toyota — mamlakatimizdagi eng ommalashgan brendlardan biri. Agar bunday imkoniyat bo‘lsa... bizning ishlab chiqaruvchilarimiz muzokaralar olib bormoqda», — dedi Uskenbayev Rossiyada Toyota zavodi yopilganidan so‘ng uning Qozog‘istonga ko‘chirilishi to‘g‘risidagi savolga javob berarkan.

Sentyabr oxirlarida Rossiyadagi Toyota zavodi avtomobil ishlab chiqarishni to‘xtatishi ma’lum bo‘lgandi. Leningrad oblastidagi Shushara sanoat hududida joylashgan zavod mart oyidan buyon ishlamayapti.

Bundan tashqari, Mazda kompaniyasi Rossiyada avtomobil ishlab chiqarishni butunlay to‘xtatish imkoniyatini ko‘rib chiqayotganini bildirgan.