Sudanda qizamiq va vabo qo‘zg‘atuvchilari bo‘lgan laboratoriya egallab olindi 

Muntazam armiya va RSF harbiy guruhi o‘rtasidagi to‘qnashuvlar davom etayotgan Sudan poytaxti Xartum shahrida qizamiq va vabo qo‘zg‘atuvchilari hamda boshqa xavfli materiallar saqlanadigan laboratoriya egallab olindi. Bu haqda JSST ma’lumotlariga tayanib Reuters xabar berdi. 

Tashkilot vakilining so‘zlariga ko‘ra, hodisa «biologik xavfning yuqori darajasi»ni keltirib chiqaradi, chunki xodimlar xavfli biologik materiallar va moddalarning to‘g‘ri saqlanishini ta’minlash uchun laboratoriyaga kira olmayapti. 

JSST vakili to‘qnashuvning qaysi tomoni ilmiy muassasani egallab olganiga aniqlik kiritmadi. 

15 aprel kuni Sudanda navbatdagi harbiy to‘ntarishga urinish boshlandi. RSF (Tezkor harbiy kuchlar) harbiylarni hokimiyatni egallashga urinishda aybladi. JSST ma’lumotlariga ko‘ra, to‘qnashuvlarda allaqachon kamida 459 kishi o‘lgan, 4 mingdan ortig‘i jarohatlangan.