Qozog‘istonda blogerlarga reklamadan soliq to‘lash majburiyati yuklandi va feyklar uchun jarima joriy qilindi

Qonunda «inflyuyenser (bloger)», «onlayn platforma», «homiylik kontenti», «jamoat hamjamiyati» va boshqa tushunchalar kiritilgan. Blogerlar reklama ostidagi postlarni belgilashi va daromaddan soliq to‘lashi kerak bo‘ladi. 

Bundan tashqari, qonunda yolg‘on ma’lumot tarqatganlik uchun ma’muriy javobgarlik nazarda tutilgan. Jismoniy shaxslar uchun jarima miqdori 69 ming tengeni (taxminan 155 dollar), bloger-tadbirkorlar uchun esa 138 ming tengeni (300 dollardan sal ko‘proq) tashkil etadi. 

Qozog‘istonda yolg‘on ma’lumot tarqatganlik uchun allaqachon jinoiy javobgarlik, jumladan, katta miqdorda jarima to‘lash nazarda tutilgan. Mamlakat Bosh prokuraturasida ta’kidlanganidek, ma’muriy javobgarlikning joriy etilishi «o‘ta og‘ir jinoyatlar profilaktikasi» vazifasini o‘taydi. 

Qonun shuningdek, qozoq tilini onlayn platformalar interfeyslariga integratsiyalashni nazarda tutadi, bu esa tartibga soluvchi organlarga nafaqat noqonuniy kontentni kuzatish, balki uni olib tashlashni talab qilish imkonini beradi. Agar bu talab bajarilmasa, rasmiylar internet-platforma faoliyatini cheklash huquqiga ega bo‘ladi. 

Qozog‘iston axborot va ijtimoiy rivojlanish vaziri Darxon Qidirali so‘zlariga ko‘ra, yangi qonun yashirin iqtisodiyot va internetdagi firibgarlikka qarshi kurashda yordam beradi. «Boshqacha qilib aytganda, oflayn hayotdagi mas’uliyat onlayn dunyoda ham talab qilinadi», dedi u.