Toshkentda Telegram orqali o‘zgalarning pulini o‘g‘irlagan yigit ushlandi

Kiberxavfsizlik bo‘limi xodimlari tomonidan o‘tkazilgan tezkor-qidiruv tadbirlarida Toshkent shahri, Yashnobod tumanida yashovchi 20 yoshli N.A. qo‘lga olindi. U odamlarning pullarini internet orqali o‘g‘irlab kelgan. 

Qayd qilinishicha, Qashqadaryo viloyati, Mirishkor tumanida yashovchi 35 yoshli fuqaro ichki ishlar organiga murojaat qilib, bank kartasidan 43,2 mln so‘m miqdoridagi pul mablag‘lari o‘g‘irlanganini aytgan. 

Kiberxavfsizlik bo‘limi xodimlari tomonidan o‘tkazilgan tezkor-qidiruv tadbirlari natijasida, mazkur jinoyatni Toshkent shahri, Yashnobod tumanida yashovchi 20 yoshli N.A. sodir etgani aniqlangan. 

U internet foydalanuvchilariga Telegram messenjeri orqali turli xil mazmundagi havolani jo‘natib, ularni qiziqtirib, bank karta ma’lumotlarini qo‘lga kiritish orqali pullarni o‘g‘irlagan. 

Holat yuzasidan Jinoyat Kodeksining 169-moddasi (O‘g‘rilik) 3-qismi bilan jinoyat ishi qo‘zg‘atilgan va tergov harakatlari davom etmoqda.