2024 yilda Germaniyadan deportatsiya qilinganlar soni 20 foizga oshdi

2024 yilning yanvaridan noyabrigacha Germaniyadan deyarli 18,4 ming kishi deportatsiya qilindi, deya xabar bermoqda Bild hukumat vakiliga tayanib. Bu 2023 yilning shu davriga nisbatan 20 foizga ko‘pdir.

Foto: Reuters

Germaniyada deportatsiya darajasi sezilarli darajada oshdi. 2024 yilning yanvaridan noyabrigacha Germaniyadan 18 384 kishi chiqarib yuborildi, bu o‘tgan yilning shu davriga nisbatan qariyb 20 foizga ko‘pdir, deb yozdi 7 yanvar, seshanba kuni Germaniyaning Bild gazetasi Germaniya hukumatining nomi oshkor etilmagan vakiliga tayanib.

Bild suhbatdoshiga ko‘ra, «deportatsiyalar masalasida federal va mahalliy hukumatlarning birgalikdagi sa’y-harakatlari» birinchi natijalarni ko‘rsatdi.

2023 yil davomida Germaniya hukumati mamlakatda qolish huquqidan mahrum qilingan 16 430 nafar muhojirni deportatsiya qildi. Taqqoslash uchun, 2019 yilda 22 000 ga yaqin deportatsiya amalga oshirilgan, shundan so‘ng COVID-19 pandemiyasining birinchi yilida ularning soni sezilarli darajada kamaydi. Bild ma’lumotlariga ko‘ra, 2024 yilda Germaniyada boshpana so‘rash uchun 213 ming ariza berilgan, bu 2023 yilga nisbatan ancha kam.

Germaniyada boshpana uchun so‘rovlar soni 30 foizga kamaydi

2024 yilda Germaniyada boshpana so‘rab murojaat qilganlar soni 30 foizga qisqarib, 230 mingga yaqinni tashkil qildi. Bu haqda 3 yanvar kuni Welt am Sonntag (WamS) gazetasi hukumat doiralaridagi suhbatdoshlariga tayanib yozdi.

Bir yil avval Germaniya rasmiylariga 329 mingta shunday ariza kelib tushgan. Germaniya Ichki ishlar vazirligi yaqin kunlarda yakuniy statistikani taqdim etadi.

Germaniya tarixida boshpana so‘rab murojaat qilishning yillik soni hozirgi darajadan bor-yo‘g‘i olti marta oshgan: 1991-1993 yillardagi Yugoslaviya urushlari paytida, 2015-2016 yillardagi migratsiya inqirozining eng yuqori cho‘qqisida va 2023 yilda, deya qayd etadi nashr.

Ishdan ketayotgan federal hukumat bir necha oy davomida boshpana izlovchilar oqimini kamaytirishdagi muvaffaqiyatini e’lon qildi, ammo maqsad sifatida faqat 2023 yildan foydalandi. Shu bilan birga, «svetofor koalitsiyasi» hokimiyatda bo‘lgan birinchi to‘liq yil bo‘lgan 2022 yilda boshpana so‘rovlari soni 2021 yilga nisbatan 47 foizga oshdi, deya tushuntiradi WamS. 2023 yilda bu ko‘rsatkich bir yil avvalgiga nisbatan 51 foizga oshgan.