Jahon | 23:40 / 02.04.2025
2611
2 daqiqa o‘qiladi

Amazon TikTokʼni sotib olishga ariza berdi

Amazon taklifi keltirilgan maktub AQSh vitse-prezidenti va savdo vaziriga yo‘llangan.

Foto: The New York Times

Amazon kompaniyasi Xitoyning ByteDance kompaniyasiga tegishli TikTok ijtimoiy tarmog‘ining Amerika bo‘linmasini sotib olishga ariza berdi, deb yozmoqda The New York Times.

Qayd etilishicha, taklif AQSh vitse-prezidenti Jyey Di Vens va savdo vaziri Govard Lyutnikka maktub shaklida yo‘llangan.

Gazeta suhbatdoshlarining ta’kidlashicha, TikTok tuzilmasini o‘zgartirish to‘g‘risidagi muzokaralarda ishtirok etayotgan turli tomonlar Amazon taklifini jiddiy qabul qilmayapti.

Amazonʼning o‘zi mazkur xabarlarga izoh berishdan bosh tortgan.

NYT’ning yozishicha, 2 aprel kuni Tramp Oq uyning yuqori martabali amaldorlari bilan uchrashuv o‘tkazish, TikTokʼning kelajagini muhokama qilishni rejalashtirgan. Potensial bitim ijtimoiy tarmoq kapitaliga amerikalik yangi investorlarni kompaniyani rasman sotmasdan turib jalb etishni o‘zi ichiga olishi mumkin.

2024 yil bahorda AQSh vakillar palatasi TikTok Xitoyning ByteDance kompaniyasidan ajratilmasa, mamlakatda ushbu ijtimoiy tarmoqni taqiqlash imkonini beradigan qonunni ma’qullagan edi. Kongressmenlarning hisoblashicha, TikTok milliy xavfsizlikka tahdid uyg‘otadi, chunki Xitoy hukumati ByteDance’ni ilovaning amerikalik foydalanuvchilariga oid ma’lumotlarni berishga majburlashi mumkin. Aprel oyida hujjat AQSh prezidenti Jo Bayden tomonidan imzolangan, yanvar oyida, Tramp inauguratsiyasidan oldin esa AQSh Oliy sudi mazkur qonunni qo‘llab-quvvatlagan edi.

20 yanvar kuni o‘tkazilgan inauguratsiyadan keyin Tramp AQSh bosh prokuroriga qonunning kuchga kirishini 75 kunga kechiktirishni buyurdi. U TikTok o‘z aksiyalarining 50 foizini Amerika kompaniyalariga topshirsa, AQSh hududidagi faoliyatini davom ettirishi mumkinligini ma’lum qilgan edi.

Mavzuga oid