Tanzaniyada parom ag‘darilishi oqibatida 136 kishi halok bo‘ldi

Afrikaning sharqiy qismidagi Viktoriya ko‘lida parom cho‘kib ketishi oqibatida halok bo‘lganlar soni 136 nafarni tashkil qilmoqda. Bu haqda Reuters agentligi mahalliy politsiyaga asoslangan holda xabar bermoqda.

Bundan avvalgi xabarlarda Tanzaniya hududiy suvlarida yuz bergan ushbu fojia qurbonlari soni 86 kishi ekani aytilgandi.

Turli ma'lumotlarga ko‘ra, paromda 300 nafarga yaqin kishi bo‘lgan.

Mahalliy manbalarga ko‘ra, qutqaruvchilar 37 kishini qutqarib olishgan. Hodisa kechqurun ro‘y bergani tufayli qutqaruv ishlarida qiyinchiliklar yuzaga kelgan.

Manbalarning yozishicha, halokatga paromga me'yoridan ortiq yuk ortilgani sabab bo‘lgan. Paromda yo‘lovchilar soni ham me'yoridan ikki barobar ko‘p edi.