O‘zbekiston – Qirg‘iziston – Xitoy temiryo‘li qurilishi boshlanadi

ShHT Samarqand sammiti doirasida 14 sentabr kuni O‘zbekiston Transport vazirligi, Qirg‘iziston Transport va kommunikatsiyalar vazirligi, Xitoy Taraqqiyot va islohotlar davlat qo‘mitasi o‘rtasida «O‘zbekiston – Qirg‘iziston – Xitoy» temiryo‘li qurilishi (Qirg‘iziston hududida) loyihasi bo‘yicha hamkorlik to‘g‘risida uch tomonlama bitim imzolandi.

Mazkur hujjat bilan Qirg‘iziston hududidagi temiryo‘l qurilishi loyihasining texnik-iqtisodiy asoslarini ishlab chiqish bo‘yicha barcha ishlarni 2023 yil birinchi yarim yilligida yakunlash belgilangan. 

Loyihaning texnik-iqtisodiy asosini ishlab chiqishda tomonlar ishtiroki, moliyalashtirish va xarajatlarni taqsimlashiga aniqlik kiritilgan.

Bundan oldin Qirg‘iziston «Xitoy-Qirg‘iziston-O‘zbekiston» temiryo‘li qurilishi uchun texnik-iqtisodiy asosni tayyorlashga kirishgandi.