«SBU» Zalujniyning yangi kabinetida yashirin eshitish qurilmalari topilganini ma’lum qildi

Ukraina Qurolli kuchlari bosh qo‘mondoni Valeriy Zalujniy kelajakda ish uchun foydalanishi mumkin bo‘lgan kabinetlardan birida ma’lumot olish uchun texnik qurilma topildi. Bu xabar Ukraina xavfsizlik xizmati («SBU») tomonidan 17 dekabr, yakshanba kuni kechqurun tarqatildi.

Qayd etilishicha, gap generalning amaldagi kabineti haqida ketmayapti. «Dastlabki ma’lumotlarga ko‘ra, topilgan qurilma ishlamay qolgan. Axborotni saqlash yoki audioyozuvlarni masofadan uzatish vositalari topilmadi», — deyiladi «SBU»ning Telegram’dagi postida.

Qurilma ekspertiza uchun taqdim etiladi, «SBU» xodimlari ushbu huquqbuzarlikni tekshirish uchun qonunda nazarda tutilgan barcha choralarni ko‘rmoqda, deya aniqlik kiritdi maxsus xizmat. Keyinroq «SBU» mazkur holat yuzasidan «ma’lumot olishning maxsus texnik vositalarini noqonuniy egallash, sotish yoki ulardan foydalanish» moddasi bo‘yicha jinoiy ish qo‘zg‘atilganini ma’lum qildi.

Zalujniy va uning xodimlari kabinetlarida yashirin eshitish qurilmalari

«Ukrainskaya pravda» internet-nashrining harbiy doiralardagi ismi oshkor etilmagan suhbatdoshlariga tayanib yozishicha, tinglash moslamasi Ukraina Qurolli kuchlari bosh qo‘mondonining ko‘chib kirishidan oldin tekshirilgan yangi kabinetida topilgan. 

Nashrning yozishicha, tekshiruv vaqtida Valeriy Zalujniyning ayrim xodimlari kabinetlarida ham yashirin eshitish qurilmalari aniqlangan.