Qozog‘iston Orolni qutqarish xalqaro fondiga rahbarlik qila boshladi 

Qozog‘iston bu yildan Orolni qutqarish xalqaro fondiga rahbarlik qiladi, deb xabar berdi Tengrinews. 

Mamlakat raisligi uch yil davom etadi va Qosim-Jo‘mart To‘qayev ham shu muddatga fond prezidenti bo‘ladi. 

Fond Orol dengizini qutqarish va umuman mintaqadagi ekologik vaziyatni yaxshilashga qaratilgan dasturlarni amalga oshiradi. Tashkilotga Qozog‘istondan tashqari Turkmaniston, Tojikiston va O‘zbekiston kiradi. 

Qozog‘iston suv xo‘jaligi va irrigatsiya vaziri Nurjon Nurjigitovning ma’lum qilishicha, Jahon banki bilan birgalikda Shimoliy Orol dengizini saqlab qolish loyihasining ikkinchi bosqichini boshlash rejalashtirilgan. Uning so‘zlariga ko‘ra, bu vazifani fondda ishtirok etuvchi barcha mamlakatlar sa’y-harakatlari birlashgandagina amalga oshirish mumkin.