Xonanda Feruza Karimova she’rdan ruxsatsiz foydalangani uchun 41,5 mln so‘m to‘laydigan bo‘ldi

Xonanda Feruza Karimova shoira Mahliyo Ahrorovaning “Dod degim kelyapti dastingdan” she’rini ruxsatsiz qo‘shib qilib aytgan. Shoira uni sudga berib, yutib chiqdi. Bu haqda Adliya vazirligi huzuridagi Intellektual mulk departamenti ma’lum qildi.

Sud majlisida aniqlanishicha, ijrochi Karimova "Dastingdan" nomli qo‘shig‘ini ijro etishda shoira Mahliyo Ahrorovaning "Dod degim kelyapti dastingdan" nomli she’riga bo‘lgan mualliflik huquqlarini buzgan.

Sudning tegishli qaroriga muvofiq, shoira Mahliyo Ahrorova foydasiga ijrochi Feruza Karimovadan BHMning 100 barobari, ya’ni 37,5 million so‘m miqdorida tovon puli va 5 million so‘m ma’naviy zarar undirilishi belgilandi.

Oldinroq Avazbek Olimov ham shoira Mahliyo Ahrorovaning “Go‘zal yorim” she’rini uning ruxsatisiz yillar davomida “Sevar yorim” nomi ostida kuylab kelgani uchun 170 million to‘laydigan bo‘lgandi.

Mahliyo Ahrorovaning Kun.uz’ga ma’lum qilishicha, shoira Olimovdan 5 ming dollar olib, qolganini o‘zaro kelishib olgan.

Ma’lumot uchun, O‘zbekiston Respublikasi "Mualliflik huquqi va turdosh huquqlar to‘g‘risida"gi qonunining 65-moddasiga asosan muallif yoki mutlaq huquqlarning boshqa egasi huquqbuzardan zarar qoplanishi o‘rniga bazaviy hisoblash miqdorining yigirma baravaridan ming baravarigacha miqdorda to‘lanishi lozim bo‘lgan tovonni to‘lashini talab qilishga haqli.