Toshkent yo‘lovchi vagonlarini qurish va ta’mirlash zavodi Rossiya kompaniyasiga ishonchli boshqaruvga berildi

“O‘zbekiston temiryo‘llari” AJga qarashli Toshkent yo‘lovchi vagonlarini qurish va ta’mirlash zavodi ishonchli boshqaruvga berilgan. Bunga “KorpInfo” Telegram-kanali e’tibor qaratdi.

Qayd etilishicha, 28 mart kuni aksiyadorlarning navbatdan tashqari umumiy yig‘ilishi bo‘lib o‘tgan. Yig‘ilish bayonnomasiga ko‘ra, kuzatuv kengashi raisi Sharofiddin Qodirov ishtirokchilarga “O‘zbekiston temiryo‘llari” aksiyadorlik jamiyatiga tegishli kompaniya ustav kapitalining 90 foiz ulushi Davlat aktivlarini boshqarish agentligiga (DABA) o‘tkazilganini ma’lum qilgan.

2025 yil 21 yanvardagi 01/3-57-sonli shartnomaga muvofiq mazkur ulush "Transport Engineering Center" MChJga bir yil muddatga ishonchli boshqaruviga berilgan. 

O‘z navbatida, kuzatuv kengashining to‘qqiz nafar a’zosi vakolatlari muddatidan oldin tugatilgan va quyidagi ko‘rinishdagi yangi tarkib saylangan:

• Mahkamov Ilhom Rustamovich - transport vaziri;
• Qodirov Sharofiddin Tahirovich - “O‘zbekiston temiryo‘llari” AJ bosh muhandisi;
• Ismanaliyev Murodjon Tolibjonovich - Transport vazirligi bo‘lim boshlig‘i;
• Muhammadiyev O‘ktam Sharifovich - DABA bosh mutaxassisi;
• Chebakov Aleksandr Yurevich – "Transport Engineering Center" ishonchli vakili;
• Ovelyan David Artemovich - "Transport Engineering Center" ishonchli vakili;
• Loshmanov Aleksandr Evgeniyevich - "Transport Engineering Center" ishonchli vakili;
• Gulyayev Egor Vasilevich - "Transport Engineering Center" ishonchli vakili;
• Lachugin Kirill Alekseevich - "Transport Engineering Center" ishonchli vakili.

"Transport Engineering Center" nomidan kiritilgan 5 nafar a’zo Rossiya fuqarolari bo‘lib, ularning aksariyati “Transmashholding” kompaniyasining top-menejerlari hisoblanadi

Bundan tashqari, “O‘zbekiston temiryo‘llari” AJ va boshqaruvning sobiq a’zolari korxonaning affillangan shaxslari ro‘yxatidan chiqarildi. Yangi a’zolar va "Transport Engineering Center" 20 foiz yoki undan ortiq ulush egasi sifatida ko‘rsatilgan.

"Transport Engineering Center" MChJ haqida

"Transport Engineering Center" 2024 yilning 18 yanvar kuni Toshkent shahrida ro‘yxatga olingan. Asosiy faoliyat turi – boshqa toifalarga kiritilmagan ta’limning boshqa turlari. Ustav fondi – 3,07 mlrd so‘m. Ta’sischilari sifatida “VTR Holdings Limited” (87 foiz) va “Vektor Texnologicheskix Resheniy” (13 foiz) keltirilgan. Ushbu tashkilotlar Moskvada ro‘yxatga olingan.

Ma’lumot uchun, 2024 yilning mart oyida prezident Shavkat Mirziyoyev “Toshkent yo‘lovchi vagonlarni qurish va ta’mirlash zavodi”ga borgandi.

«Mamlakatimizda temiryo‘l transporti rivojlanib, qatnovlar soni ko‘paymoqda. Bu vagonlarga bo‘lgan talabni ham oshiradi. Mazkur zavodda 16 turdagi yo‘lovchi vagonlari ishlab chiqariladi va ta’mirlanadi”, deyiladi prezident matbuot xizmati xabarida.